Вештини важни за тинејџерите

 

Да се биде тинејџер е многу лесно. Или барем така мислат возрасните. Ја имаме слободата како да сме деца, но и училишни и вонучилишни обврски кои ни исполнуваат голем дел во денот како да сме возрасни. Вистината е дека не сме ниту деца, ниту возрасни, туку нешто помеѓу. Сè уште учиме како да бидеме „големи“ и ни треба помош во многу работи. Ова се некои од вештините кои се важни за нашиот правилен развој:

1.  Чистота и лична хигиена. Чистотата е едно од основните правила на хигиената. Нашата работна и животна средина секогаш треба да бидат уредни и чисти. Одржувањето лична хигиена, да знаеме како да го исчистиме домот и да го одржуваме наместен и среден се основните работи што треба да ги знаеме.
2. Вештини поврзани со храната и готвењето. Набавка на продукти, готвење поедноставни јадења, користење на кујнските апарати, разликување на здравите од нездравите намирници, се само некои од примарните животни вештини за тинејџерите.
3. Управување со времето. Со добри организациски вештини можеме успешно да го испланираме денот, да стекнеме работни навики и да бидеме ефективни. Овде многу помага да направиме распоред на активности и да се придржуваме до него, да правиме разлика помеѓу важни и итни работи, и одговорно да го користиме времето. 
4. Управување со парите. Парите не се најважната работа во животот, но се од витално значење за удобен живот. Финансиската дисциплина е важна вештина што треба да ја научиме уште на тинејџерска возраст. Умешноста за буџетирање ни помага да ја научиме вредноста на парите, свесно да трошиме, да знаеме да штедиме и да планираме за иднината. 
5. Ефективно менаџирање на стресот. Стресот е составен дел од животот, но добро е да знаеме дека има начини за успешно справување со него. Некои од нив вклучуваат: доволно спиење, дружење и забава, здрава исхрана, физичка активност и спортување, организација и планирање на времето, пишување дневник, зборување за стресните ситуации со родителите или друг возрасен од доверба и друго. 
6. Преземање одговорност за своите постапки. Преземањето одговорност подразбира правење разлика помеѓу тоа што е исправно, а што погрешно, што е добро, а што лошо и прифаќање на последиците од своите постапки. Тоа е единствен начин да се изгради добар карактер. 
7. Позитивен систем на вредности. Зависно од вредностите кои се негуваат во семејството, тинејџерите може да добиваат незаслужени работи, кои не ги заработиле со личен труд, но тоа е одлика на лабави морални и етички вредности. Само заслужената награда од нас ќе направи подобри, поуспешни и луѓе вредни за почит. Други позитивни вредности кон кои треба да тежнееме се: личен интегритет, искреност кон себе и со другите, чесност, одговорност за сопственото здравје, грижа за другите итн. 
8. Социјален живот и манири. Социјалните вештини за тинејџери вклучуваат: развивање и одржување пријателства, здрави семејни односи, вреднување на односите и луѓето во нашиот живот, почитување на другите и нивните ставови (и тогаш кога се разликуваат од нашите), негување хобија и рекреативни активности како можност за запознавање истомисленици, културно и учтиво комуницирање, активно слушање, емпатија и друго.

 

Автор и уредник: Алексеј Стојановиќ IX-3